Pêşengîya Komela Ziwan û Kulturanê Mezopotamyayî (MED-DER) û Enstituya Kurdî ya Amedî çarçewaya 15ê Gulane Roşanê Ziwanê Kurdkî Amed de rayîrşîyayîş ame organîzekerdene û dima eşkerayî ameye dayene. Eşkerayî ra ver Qada Şêx Seîdî ra heta Bircê Kêneke ya qezaya Sûrî rayîrşîyayîşê ame kerdene. Rayîrşîyayîşî de pankartê bi lehçeyanê kurmancî û kirmanckî ke ser o “Wa ziwanê Kurdkî bibo ziwano fermî û perwerdeyî” , û “Stauyê Kurdkî, perwerdeyîya bi Kurdkî” ameyêne nuştene, ameyê akerdene. Dowîzê sey “Dem demê ziwanê Kurdkî yo” , “Cinî, Ciwan, Kultur û Ziwan” , “Seba Kurdkî Têkoşîn” , “Ma perwerdeyîya bi Kurdkî wazenê” , “Dem demê ziwanê Kurdkî yo” , Kurd Kurdî Kurdîstan” , “Wa Kurdkîş bibo wayîrê statu” , “Her ca Kurdkî her dem Kurdkî” û “Ziwanê mi sînorê welatê min o” ameyê hewanayene. Erbaneyan reyde deyîrî ameyê vatene û pêroyî rayîrşîyayîşî de sloganî “Ziwanê mi rûmetê min o” , “Dîsa dîsa serhildan têkoşîn ji bo ziman” , “Bê ziwanî cuye nêbena” ameyê vatene. Demê rayîrşîyayîşî de zî welatijê derûdorî zî çepikan reyde paştî daye rayîrşîyayîşî.
Êyê ke tewrê rayîrraşîyayîşê/meşî bîyê û înan ra hemwelatij Mehmet Uyguner, Endamê Meclîsê Peyasî Eyup Erguç rojnameyê ma rê qiseyî kerdê.
“Rojê Roşanê Kurdkî bimbarek bo
Hemwelatij Mehmet Uygunerî vat ke: “Ez munasebetê nê Rojê Roşanê Kurdkî ra, roşanê heme şarê ma bimberek keno. Ma wexto ke ma maya xora bîyê û ma ziwanê maya xo qalî kerdînê û enka zî ma vernî de ganî ziwanê maya xo keyeyê xo de û taxa xo de û heme derdorê xo de qalî bikerê û seba ke ziwanê maya ma vinînêbo.”
Uygunerî wina domna: “Birêz Ocalanî vatêne wexto ke, yew kerge awe wena, sereyê xo berz kena û ziwanê xo reyde venga lîçikanê xo dana. Ma zî ganî her wext ziwanê xo reyde gedanê xo reyde qalî bikerê ke ziwanê ma aver şêro û eke ma wina nêkê ziwanê ma vindî beno.
Gedeyê ma keyeyê xo de ziwanê xo qalî nêkenê
Mehmet Uygunerî vatena xo wina qedênê: “Ma enkay ra nêeşkenê ke verba asîmîlasîyonî de vinderê. Çimkî gedeyê ma keyê xo de bi ziwanê maya xo qalî nêkenê. No war de, vernê de mayî sûcdarê. Çimkî ma 24 saetî keye de nîyê û no warî de ganê mayî hîna zaf hîsgêr bê û gedanê xo reyde ziwanê aya xo qalî bikerê. Seba xebata ziwanî zaf kemanî esta û ma ganî ziwanê xo rê wayîr bivejîyê û zaf xebate bikerê. Ganî ziwanî ser dibistanan de perwer bêro dayîş, heyan statûyî ziwanê nêro qebûlkerdiş, ziwan zî aver nêşono û vindî beno.”
Ganî ma wayîrê ziwanê xo bivejîyê
Endamê Meclîsê Şaraderîya Peyasî Eyup Erguçî zî wina vat: “Bi munasebetê roja 15ê Gulane ez Roşanê şarê kurdî pîroz keno. Seba xebatê ziwanî, ma zaf tepîya mendê, çimkî ma xebata ziwanê xo nêkerda û ma wayîrê ziwanê xo nêvejîyayê. No sebeb ra zî şar nêeşkeno ke ziwanê xo reyde xo îfade bikero.
Ganî ma verba asîmîlasîyonî xover bidê
Heyana ke ziwan, ziwanê pazarî nêbo se, ziwan zî aver nêşono. No sebeb ra zî ma her wext verba asîmîlasîyonî, ri bi û ri manenê.”
Eyup Erguçî, wina qedêna; “Ganî ziwanê kurdkî, bi fermî qebul bibo û dibistanan de bibo ziwanê perwerdeyî û ganî statûyê ziwanê kurdkî bêro qebûlkerdiş. Tewr verî ganî statûyê kurdan bêro qebûlkerdiş.”
