Tevgera Jinên Azad (TJA) der barê meşa ku dê ji aliyê bi hezaran jinan ve di 31ê gulanê de saet di 16:00an de li Qada Şêx Seîd a li Amedê were lidarxistin, daxuyaniyek nivîskî weşand.
Di daxuyaniya bi sernavê “Jin ji bo aştiya civakî û çareseriya demokratîk dimeşin” de hat gotin ku “Em jinên ku ji bo jiyanek bê şer, bê îstîsmar, jiyaneke wekhev û edaletê têdikoşin, kirdeya avakirina çareseriya demokratîk a pirsgirêka kurd in.”
TJAyê di daxuyaniya xwe de ev tişt got: “Piştî banga Birêz Ocalan a 27ê sibatê, deriyên aştiyek bi rûmet li welatê me vebûne. Em jin in ku dê vê bangê herî zêde qebûl bikin û civatek demokratîk ava bikin. Em dizanin ku civaka demokratîk jiyaneke sosyalîst a wekhev û azad e. Em avakerên vê jiyanê ne. Ji ber vê sedemê; em ji bo aştiya civakî û çareseriyên demokratîk dimeşin! Em bang li hemû çalakvanên jin, femînîst, ekolojîst, jinên ciwan, rewşenbîr û hunermendên ku parêzvanên mafan in, jinên ji netewe û baweriyên cuda dikin ku ji bo parastina jiyaneke azad û wekhev bimeşin. Em dizanin ku em jin hêza veguherîner a jiyanê ne. Em dizanin ku civak nikarin azad bibin heta ku jin azad nebin. Em dizanin ku her tişt dikare bibe, ger em bixwazin. Werin em hemû bi hev re di 31ê gulanê de saet di 16:00an de li Qada Şêx Seîd a Amedê soza xwe ya ji bo civakek demokratîk bilind bikin!”
