22ê nîsana 1898î de Kahîreya Misirî de rojnameya kurdîye ya verêne ya ke nameyê xo Kurdistan bî hetê Miqdat Mîdhat Bedirxanî ra ame weşan kerdiş. 1989 ra heya 1902î, 31 humarê na rojnameya kurdî ame veşan kerdene. No sebeb ra zî her serre hetê çapemenîya kurd ra 22ê Nîsane sey Roja Rojnamegerîya Kurdkî yeno pîrozkerdene. Seba na roje rojnameger Semra Turane rojnameyê ma rê qiseyî kerdî.
Semra Turan dîyar kerd ke Roja Rojnamegerîya Kurdkî 127 serrîyo ke yeno pîrozkerdene û wina va: “Çepkerdişê rojnameyê kurdî Kahîre de destpêkerd û ewro zî xo resnayo heme şaran û xo dayo naskerdiş. Her 22ê Nisane de hetê çapemenîya kurd ra yena pîroz kerdiş. Bi kurdî ziwanê xo û nasnameyê xo danê naskerdiş. Ma tarîxê xo bi nuştuş Kahîre de destpê kenê û heyana ewro. Çapemenîya kurdan nê 50 serranê peyênan de xo xeylî avêr berd. Çapamenîya azad xo aver dana û pîl kena. Ozgor Gundem, Yeni Ozgur Politika, Azadiya Welat, Xwebûn, Ajansa Welat kurdî, kurdîwarî xo resnenê heme cayanê dinya. Belkî ma roja rojnamegerîye 22ê Nisanî de pîroz kenê la ma nê warî de zaf zor û zahmetî dîye û zaf bedelê pîlî dayî. Rojawa, Federe Kurdistan da embazê ma, vengê xo resnenê heme dinîya ayî sebeb ra yenê qetil kerdiş. Zor zahmet ancenê bi xeberan ra xora nîşanê heme cayan danê. Tirkîya de embazê ma yenê tepiştiş û îşkence veynenê. Çapemenîya ma têkoşîna xo ziwanê xo û nasnameyê xo averdanê bindestî qebûl nêkenê. 22ê Nîsanî roja rojnamegerî wa biba wesîleya rojnamegerîya azad.”
Fekê asîmîlasyonî ra fek veradê
Semra Turane derheqê zazakî de wîna domna: ”Ziwanê lehçeyanê kurdî, senî aver şêyro. Vera politikaya asîmlasîyonî ra senî ver bigîrê. Dewlete heme hetî ra politikaya asîmlasîyonî dana şixulnayîş. Şarê kurd zî ganî vera asîmlasîyonî ra gedeyanê xora ziwanê maya xo qalî biker o. Rojnameyê kurdî Rojnameyê Xwebûn, Ajansa Welat seba ziwanê xo xebata pîrozî kenê. Wa heme kes bi ziwanê lehçeyê zazakî aver şêyro û vînî nêbo. Seba ke ziwan nêro vinbîyayîş ganî mekteban de bibo ziwanê fermî.”
Semra Turane wina qedîna: “Ma zî xo bi xo asîmle kenê û ganî fekê asîmlasîyonî ra fek veradê û ziwanê xo heme hetî ra aver bidê. Sektora medya de ziwanê kirmanckî hîna zaf bêyro şixulnayîş.”
