Luye pirçê xo bedilnena, la karakterê xo nêbedilnena. Bi taybetî 27ê Sibate ra pey yanî badê ke Serekê PKK’yî Abdullah Ocalanî Vengdayîşê Aştî û Komelê Demokratîkî kerd, pawîya ke hukmatê AKP’yî çarçewaya persa kurdan û demokratîkbîyayîşê Tirkîya de tayê gamanê şênberan bierzo. La koyî awrêş ard dinya. Dawul o dawul o, dargopik o dargopik o. Erdogan ferman dano, “emîrberê” ci anê ca. Hem zerre hem zî teber ra şero taybet û polîtîkaya îmhayî ramîna.
Çend rojan verî TSK’yî goreyê fermanê “wayîrê” xo dewa Berxbotanî ya Kobanê daye bombayan ver. 7ê ci domanî 10 kesî bi hovî ameyî qirkerdene. Ne hukmatê Erdoganî ra ne zî hetê dezgehanê bînan ra eşkerayîye ameye kerdene. Na hişmendîya qirker û dirî ya. Hetêk ra kurdan reyde pêvînayîş bike, hetekê bînî ra bi hawayêko binkor kurdan bikişe. Ne exlaq, ne mentiq ne zî şerm est o. Berxbotan de no qetlîyamo dideyin bî. Seke zanîyeno 2015 de cerganê DAÎŞ’î gala dewe kerde û 27 dewijî xedarane qir kerdî. Labelê DAÎŞ bin kewt û nêeşka kurdan bido çokdayene. Nika TSK sey mêraswerê DAÎŞ’î têgereno û wazeno waştişê cergan bîyaro ca. Xora çend aşmî yo Awbendê Tişrînî de her tewr hêrişanê gemarinan serûber keno. Netîce de TSK zî sey DAÎŞ neçar mend.
Erdogan û HTŞ
Îqtîdarê AKP’yî armanc keno ke îdareyê Şamî zî bigero binê bandora xo. Erdogan wazeno Colanîyî sey “walîyê herême” bişuxilno. Coka 8ê kanûna 2024î ra nata Şamî ser o polîtîkaya “kolonîzekerdoxe” ana ca û plan kena ke HTŞ’yî îdare bikero. Destpêk ra heta nika waşt ke mîyanê HTŞ û SDG’yî de çi peymanêke nêbo. Coka peymana ke bi destê wirdî hetan 10ê adare de ameye îmzekerdene, rixmo ke Erdoganî paştî daye ci, esasî stratejîyê dewleta tirke xeripna. Erdoganî caro nêwaştêne ke Rojawan hetê Şamî ra bêro şinasnayene. Planê AKP’yî yo nimitkî, çinkerdişê Rojawanî bî. Xora 3 mengî yo ke Awbendê Tişrînî de cerganê SMO’yî sey “rim” xebitneno.
Pêkerdişê Şaristanî
Şar paweno ke qanûno bingeyî yo newî bivirazîyo. La hukmatê AKP’yî îqtîdarê Erdoganî hîna pîl keno. Destbendkerdişê Îmamogluyî de her çî zelal bî. Bi destê hukmî dîplomaya Îmamogluyî ameye betalkerdene. Hem hukm hem zî Unîversîteya Stenbolî xizmetê îqtîdarê Erdoganî kerd. Hêrişê Îmamogluyî de “Pêkerdişê Şaristanî” zî ame hedefgirewtene. Oxina ke Pêkerdişê Şaristanî pêkerdişê dînamîkanê cîyayan o. Yanî nimûneyê demokrasî yo. Îqtîdaro ke Pêkerdişê Şaristanî ra terseno, demokrasî ra terseno. Nameyê nê îqtîdarî “otokrasî” yo.
