42 serrîyo Kurdistan û Tirkîya de mabenê Artêşa Tirke û Gerîllayanê PKK’yî de şer est o. Birêz Ocalanî, însîyatîf û verpersîyarîyêka pîle girewt milanê xo ser û vengdayişo muhîm kerd. Tesîrê vengdanî, ro Welat û hemeyê dinya de zemînêko erênî awan kerd. Hetê Kurdan, bi vengdanê Birêz Ocalanî xeta aştî û civatê Demokratîkî de qerarê xo da. Dora gameştişî, Dewleta Tirke û îktîdarê AKPyî de ya. Kurdî û heme raya pêroyîye, omûd kenê ke Dewleta Tirke û îktîdarê AKP’yî, cevabê vengdayişê Rayberê Şarê Kurd^Abdullah Ocalanî bidê. Abdullah Ocalanî, dorêka bîne, seba aştî û civatêkê demokratîkî şansêko pîl awan kerd.
Birêz Ocalan wayîr ferasat, fikir û felsefeyêka gelêke xurîyî yo.
Pêyvenayîşê heyetê Îmralî û eşkerayîya Rayverê Şarê Kurd Abdullah Ocalanî ser o, embazê mayo rojnemeger bi serrano ke, ewropa de ciwîyeno û eynî wext rojnemeger o û xebatkarê Stêrk TV yo. No sebeb ra ma Huseyî Dag ra pers kerd eyî zî rojameyê marê qiseyî kerd.
Ti vengdayîşê Rayverê Şarê Kurdî Abdullah Ocalanî senî vînenê û ewropa da hemwelatijan ser o senî veng da?
Huseyîn Dag: “27’ê Sibata 2025’ine de, hemserokê DEM partî, endamê heyeta Îmralî û pawitoxê Birêz Ocalanî zî di mîyan de 7 kesî şîyê Îmralî û badê pêvenayîşê 4 seetanê girawe ra tepîya ageyray. Heman roce Stenbole de kombîyişêkê çapemenîye ro do dar vist. Kombîyişê heyeta Îmralî 500’yî zêdîrî kedkar û xebatkaranê çapemenîya Kurdistan, Tirkîya û dinya teqîp kerd. Min bi xo zî, ganî kombîyişê çapemenîya heyeta Îmralîyî ya Stenbolî taqîp kerd.
Vengdayena Rayberê Şarê Kurdî birêz Abdullah Ocalanî ro min zaf tesîr kerd. Çimkî Birêz Ocalanî seba aştî û Civatê Demokratîkî vengdayenêko tarîxî kerd. Xora min zî zey xeylê kesan, wextê dîlkewtişê ey ra heta nika heme prosesê Îmralîyî taqîp kerdîbî. Birêz Ocalanî, xo pawitişê Mehkemeya Îmralîya serra 1999. de dest bi na prosesa aştî û demokrasîyî kerdebi. No sebeb ra min bi xo di vengdanê 27’ê Sibatî de şok derbaz nêkerd. Reyna zerreyê ney 5 aşmanê peyînan de zî, ma seba vengdanê wûnayînî tay xo hedre kerdebi.
Seba min adirbest û ronayişê sîlehan zaf suprîz nêbî. Seba min suprîz û şoko pîl, yê vengdayenê Rayberê Şarê Kurdî, waşteka feshê PKK’yî bi. Çimkî ez bixo 50 serrîyeya û ez Licêya Amede de ameya dinya û pîl bîya. Min çimê xo bi PKK û Gerîllayanê azadîya Kurdistanî akerdîbî. Coka seba min no waştek û vengdanê Birêz Ocalanî ey seba feshê PKK’yî zaf zor bi. La dima ra ez ney vengdanî sera xeylê wextî fikrîyaya û min vat, birêz Ocalan wayîr ferasat, fikir û felsefeyêka gelêke xurîyî yo, coka hesabêke eyî seba vernîroca şarê ma est a.”
No piroses û vengdanê Rayverê Şarê Kurdî Birêz Abdullah Ocalanî do senî aver şêro?
Huseyîn Dag: “PKK badê 3 rocan cevabê Vengdanê Birêz Ocalanî da û vat, ma bê şert û bê şirut ney vengdanî qebûl kenê. Û dima ra PKK û HPG adirbest îlan kerd. Dewleta Tirke û xeylê dormeyanê bînan îhtîmal dayne, la her kesî vatên do PKK bi şert vengdanê Rayverê Ocalanî qebûl bikero. La dorêka bîne, PKK îradeyê xo yo sîyasî, rayvistinê û vernîroca tekoşîna xo bê şert teslîmê Birêz Ocalanî kerd. 26 serrîyo birêz Ocalan zîndanê girawa Îmralî de yo û seba azadî, demokrasî, aştî û çareserîye xo ver dano. Xoverdêrîya ey, seba vernîroca şarê Kurdî û xusîsî zî seba heme cenîyan zey nimuneyî yo. Kurdî, Cenî, PKK û heme hêzê tekoşîna azadîya Kurdistanî, rayira çareserî, azadî û demokrasîyî xeta Birêz Ocalanî de vînenê.”
Ganî dewlet û îktîdar gamê lezanan berzê?
Huseyîn Dag: “Seba ke aştî û pergalêka demokratîke awan bibê, gere dewlet û îktîdarê AKP’yî, tay gamêy lezînan berzê. Lazimo Artêşa Dewleta Tirke, hewayî û bejayî ra êrîşê heremanê pawite yê medya nêkero û adirbest îlan bikero. Reyna lazimo îkîtdar, hetê sîyasî, Hiquqî û îdarî ra gamanê esasîyan berzo. Sebebo ke no proses birehetî ver bi pêameyişî şêro, gere şertê Îmralî û xebatê Birêz Abdullah Ocalanî bêrê vurnayene.”
