Wisar o
Wisarê nêrgiza mi
Newe abîya…
Xêlî bi xemla ti, henga mi
Gama ke ez bi çiman ameyêne ramûsanê lewanê to
Çimanê mi de şilîya şerman
To mi ra dûr berdêne…
To da ray û ti şîya
Zerrîya mi de mendê rêçê awiranê to.
***
Ti nêşîyêne!
Ma şan bi şan sîneyîş pawitêne
Û ti şîya
Rismê şîyayîşê to awiranê mi wa aliqîya…
Sûsika mi
Huyayîşê to yo nîmcet
Janê mi…
De şo
Ti berrîya vewre ya êdî
Kaleka min a çape de…
***
Nika
Ez tenê ya, bê to
Vîrê mi, xîyalê to
Û lewê Dîcle de awa lêle
Wazena gunanê xo û to pîya birijnî
Ax xuşşînîya pêlan
Mi xapênenê bi ameyîşê to…
Ti Dîyarbekirî sînena mi ra hez bike
Berê Koyî ra hetanî Berê Ruha
Gaman peymawena ez
Ver û verê bedenî de…
Vayêko honik sipeno
Vayê koyan…
Boya rîhanî tede
Vakur ra yeno, nermek
Xuşşînî kewta pelanê çinêyeran ser
Valêrî porê xo şane kenê vayî ver de
Xubêrî boyêka xumrî resnenê heme ca
Çîve-çîvê meqesokan a, mîlçikî bi wîle-wîl
Porê bedenî; çokek vaş
***
Sereyê mi xoş
Canê mi mest…
Xîyalê mi de abîyayîşê vilêka sûre
Û serê engiştanê rojî ra ez
Sosinan çînena qevd bi qevd…
Tîya şerq o; yanî Dîyarbekir
Şinge-şingê tasanê sifrênan a
Awa sûsî roşeno Bavê Elo û kênekî tuyan;
Lewê înan “qere hubur”
***
Dûyê kebabê cigere vila beno
Binê ziwanê mi de tahmê çayêka qaçaxe
Û zinca mi boya titûnê Helhelî ra pirr
Ex tewirêna ya ewro; sermest
Zerrîya mi yew pirpirok a ewro
***
Rîyê asmênê nîlgunî de hewrê gulanî
Vayî dest dano hewran û yena war:
Reşêşêka hurdî…
Dima ra, asmênê Dîyarbekirî de
Keskesûre bena keman
Kerreyê dêsê bedenî sereşute
Awin-awin huyenê
Û kewe-kewe beriqênê pelê daran
Dîyarbekir o tîya; heme ca rengîn…
Kênekêk wet ra yena; esmer-esmer
Çimê aye mîyanê zeytî de çutêk zeytûnî
Û lewanê aye ser o çilkê vartî
Poro sîya vayî ver de rewan…
***
Mîlçikî wanenê
Û ma, çimanê yewbînan ra awiran remnenê
Alişkanê ma de vilî abenê
Di zerrî: di pencereye akerdeyî;
Di boranî sipî-sipî perrenê qefesan ra
Û ma çimanê yewbînan ra şerab şimenê:
-Noş
-Noş!…
Çime: Roşan Lezgîn, Dêsan de Sûretê Ma Nimite, Weşanxaneyê Vateyî, Stenbol, 2005, rr. 33-35/49-52.
