Rayberê Şarê Kurdî Abdullah Ocalan 27 serrî yo di binê tecrîdê sîstematîk û xedarî de xover dano. Tenê xover nêdano bi aqilê xo, bi zanayîşê xo, bi ferasetê xo mudaxaleyê hereknayîşê tarîxî keno û xetê averşîyayîşê tarîxî bedelneno.

Rayberê Şarê Kurdî 1973yî ra nata yanî herî kemî 52 serrî yo bi awayêko aktîf û bêbeyntar xoverdêrîya kurdan rê rayberîye keno. Di encamê na xoverdêrî û rayberîye de kurdo merde hişyar bî, mezel ra wişt wê û bî xoverdêrê seserre yo herî namdar.

Di xoverdayîşê şaran de hevsengîya xoverdêranê çekdaran û bi zanayî rayreberdişê polîtîka zaf muhîm o. Wexto ke şert û mercê polîtîka û sîyaseto demokratîk çinê bo, çek kuno dewre. Heke di encamê şerê xoverdêrî yo çekdarî de şert û mercê polîtîka û sîyasetê azad û demokratîkî virazîya di xoverdêrîya çekdare de israrkerdiş xerabîya herî gird a.

Rayberê Şarê Kurdî Abdullah Ocalan keso ke heskerdoxê çeke yan şerwaz nîyo û çi rayan di şer de israr nêkerdo. Keso ke aştîwaz o û hertim di aştî de israr kerdo. Hertim qabê akerdişê raya polîtîka û sîyasetê demokratîkî kedêka bêhempa daya û dano.

Qabê pêkardişê aştî û akerdişê raya sîyasetê demokratîkî serranê 1993, 1995, 1998, 1999, 2006, 2009 û 2013yan de 7 reyî agirbest ame îlankerdene. Enîne ra yew de agirbesê 1999î de PKK ame feshkerdene. La çi heyf ke dewleta tirke fek polîtîkaya xo ya qirkerdiş û çinêkerdişê kurdan ver nêda û di şer de israr kerd. Loma nê hewldayîşê Rayberê Şarê Kurdî Abdullah Ocalanî heme bêencam mendî.

Belê hewldayîşê Rêzdar Abdullah Ocalanî yê aştî û yê kerdişê raya sîyasetê demokratîkî bi sernêkewtî, la xoverdayîşê şarê kurdî qels nêbîyî û têk nê şîyî. 2004 de PKKyî xo newe ra awan kerd û xoverdayîşê xo bi xurtî verdewam kerd.

2015î ra nata dewleta tirke di çarçewaya şerê topyekûnî de bi heme teknîkê NATOyî û bi heme qewetê xo hêrîşê kurdan kena. 10 serrî vîyartî ra, la nêşikayî xoverdayîşê kurdan bişikno û tasfîye bikero. Nê 10 serran de xoverdayîşê kurdan roj bi roj xurt bî û destkewteyê cîvaka kurde zêde bîyî.

Rayedaranê dewleta tirke vîna ke nêeşkenê xoverdayîşê kurdan tasfîye bikerê. Xurtbîyayîşê kurdan verdewam keno. Qewemnaye û averşîyayîşê ke Rojhilatê Miyanîn û cîhan de pêk yenê, rayê averşîyayîş û xurtbîyayîşî ro kurdan kenê a. Di heman wext de zaf alternatîfanê pêkardişê tifaqanê neweyan kurdan rê virazyenê. Yanî konjonkturê cîhanî û yê Rojhilatê Miyanînî xeberanê zaf xerabinan dano dewleta tirke. No konjonktur dewleta tirke ra vano ya ti go xo bibedelnê yan zî ezo to bibedelnî. Bedelnayîşê înano ke ma Iraq û Sûrîye de vîna, seyin o.

Nê heqîqetan dewleta tirke neçar kerd ke raynê verê xo bido girawa Îmrali. Ez bawer kena ke belkî serêke zêde ra nîqaşanê di beyntarê Rêzdar Abdullah Ocalan û rayedaranê dewlete de verdewam kerdo. No nexşerayê seserre yo ke Rêzdar Abdullah Ocalanî hedre kerdbî û di 27ê Sibate de şandeyê Îmrali wend, bêguman encamê nê nîqaşan o.