Qada Şêx Seîdî de şar ame pêser û vera qirkerdişê Elewîyanê eşkerayîye daye. Çalakîye bi hemkarîya PASAKD, DEM Partî û ALÎM DER’î Meydanê Şêx Seîdî de ameye viraştene. Çalakkeran hêrsê xo yê vera qirkerdişanê Elewîyan ard ziwan û veng da Neteweyanê Yewbîyayeyan û raya pêroyî ke vengê xo berz bikerê.

Aktîvîsto Elewî Îmam Balseverî va ewro ê vera qirkerdişanê Elewîyan ameyê têhet û nê qirkerdişê hovaneyî şermezar kenê.

Balseverî va: “Yezîd her wext yezîd o û zîhnîyetê qirkerdişî dewam keno û nêvindeno. Yezîd eynî yezîd o û zînîyet nêbedilîyeno.”

“Raya verên a ke Rojawanî de Kurdî statuyê xo virazenê”

Balseverî dewam kerd: “Ganî ma vera nê qirkerdişan xo bipawê û yewbîyayîşê xo awan bikê. Eke ma vera qirkerdişê Emewîyî xo nêpawê, her wext nê qirkerdişê hovaneyî do virazîyê. Miletê ma, şarê ma ganî xopawitişê esasî awan bikê. Rojawanî de hetanî ewro zaf Kurdî ameyê qirkerdiş. Mazlum Ebdîyî zaf çîyê erjîyayeyî vatî û na peymane de her milet xo tede îfade keno. Çîyêko rind bîyo û ma ganî piştî bidê nê sîstemê neweyî.”

“Ganî ma pawitişê xo yo esasî awan bikê”

Balseverî dîyar kerd ke na paradîgma ser o ganî pêro bêrê pêser. Raya verên a ke Kurdî bi îradeyê xo yew statu virazenê.”

Balseverî qiseyê xo wina qedênayî: “Rojawanî de seba ke peymana newîye yena awankerdiş, her milet xo tede vîneno: Elewî, Suryanî, Keldanî, Armenî, Ereb û Tirkmenî. Heme kes rewşa demokratîke de azadbîyayîşê xo vîneno. Vanê Esad Elewî yo, Esad qet Elewî nîyo. O zî eynî hewayê Yezîdan Elewîyan rê û miletanê bînan rê zilm kerdo. Bawerîya ma tena Rojawanî û bi Mazlum Ebdî est a.”