Rayberê PKK’yî Abdullah Ocalanî pêvînayîşê 28ê kanûne de xerîtaya ke 7 madeyan ra yena meydan, şarî reyde pare kerde û berpirsîyarî daye meclîs, partîyê sîyasî, rêxistinê komelkî û heme beşanê şarî. Badê ke heyet zaf partî û rêxistinan reyde pêvînayîşî kerdî, 27ê Sibate de reyna şî Îmrali û agêra. Na rey Rayber Abdullah Ocalanî beyanatêko sey manîfesto şarî reyde pare kerd.
Çapemenîya kurdî, Tirkîya û dinya eleqeyêko xususî û zaf pîl da beyanatî. Hemîne çapemenîya ke Îstanbul de seke bi serran o ke paweyê nê mesajî bîyî, kewtî pêşbazîya weşanî. Zaf dezgeyê çapemenîye weşanê zindî kerdî û hem demî de mesaj bi şaranê dinya reyde pare kerd. Abdullah Ocalanî bi kurdkî û bi tirkî mesajê “Vengdayîşê aştî û şarê demokratîkî” ke tedeyîyê ci zaf dewlemend o û sey manîfestoyî yo, şarî reyde pare kerd. Des hebî bajaranê Kurdistanî de kurdî û dostê kurdan xo eşt qadan û goşdarîya mesajê Abdullah Ocalanî kerd. Badê ke mesaj ameye parekerdiş, temsîlkarê dewletan, partîyê sîyasî û rêxistinê dinya mesajê Abdullah Ocalanî nirxna û eyinî dî.
Hemwelatijan Hidir Karataş, Medenî Alpkaya û Salîh Açikguzî zî beyanatê Rayberê Şarê Kurd Abdullah Ocalanî ser rojnameya ma rê qiseyî kerd. Hemwelatijan waştoxê xo yê verênî pîya ardî ziwan “Bi verênî ra hepsîyê sîyasî û hepsîyê nêweşan serbest veradê, eştişê qeyûm tepa bigîrê. Galakerdişê êrîşê Rojawa bêyro vindertiş. Ziwan kurdan bi fermîyete de bêr o perwekerdiş, Statuyê kurd bêyro naskerdiş.
Serokê Şarê Kurdî goge eşte hetê dewlete ser
Hemwelatijan ra Hidir Karataşî vat no proseso ke newe destpê kerd û seba nê pêvênayîş de Rayberê Şarê Kurd Abdullah Ocalanî deklerasyonî erşawitî û nê deklerasyonî zî DEM Partîye heme partîyan ra û raya umumîye rê pare kerdî. Serokê Şarê Kurdî goge eşte dewlete ser. Ganî dewlet zî gureyê xo biker o. Bi verênî ra hepsîyê sîyasîya û hepsîyê nêweşan serbest veradê, eştişê qeyûm tepa bigîrê. Galakerdişê êrîşê Rojawa bêyro vindertiş. Ziwanê kurdan bi fermîyete de bêr o perwekerdiş, Statuyê kurdan bêyro naskerdiş.
Ganî sazî û komelê ma seba nê prosesê newî weş bixewetîyê
Ta bî nê tewr zaf wext gêno. Ganî verê ronayîşê çekan ra, ganî Serok azad bibo. Ganî ewlehîya Serokî bibo. Nê warî de heme dewlatan seba vengdayîşê Serokî ra erê dayo. Sewbîna zî ganî sazî û komelê ma seba nê prosesê newî ra weş bixewetîyê.
Ganî Tayyîp ziwanê xo terbiye biker o
Hidir Karataşî peynîya vatena xo wîna arde: “Seba ke nê pêvajoyî kesî ke estî, nê prosesi sobete bikerê û înan ra beşlî çete zî esto, seba ke ranteya xo karbîyarê prowaksîyonî virazîyenê.” Seba ke nê prowaksîyonî nêvirazîyê û ganî verê verênan Tayyîp Erdogan ziwanê xo terbiye biker o û şarê kurdî tehdit nêker o. Tayyîp Erdogan vano. ‘Ma kerra ser o kera û sere ser ro sere nêverdanê.’ No tewr vatiş, vatiş o xirabo.
Vendayîşê sedserrano
Hemwelatij Medenî Alpkaya yî zî fikrê xo nîya dîyar kerd: “Têgêrayîşê Azadîya şarê kurd nê 40 serrî yo ke tekoşîna xo dewam kena. Seba nê prosesê newî ra Rayverê Şarê Kurd gama dîrokî, gama bingeyîye eşte. Serra 2013 de zî, nê tewr game muhîmî amey eştiş, la mixabin hem dewlete û hem zî têgêrayîşê kurd zî nêeşkeyayî ke nê prosesî weş biramê. Emser zî eştişê nê gama zaf avzelo û vengdayîşê dîrokîya sedserana.”
Ganî binê nê prosesê newî beyro pirkerdiş
Medenî Alpkayayî peynîya vatena xo nîya girê dê: “Vengdayîşê Rayberê şarê kurd Abdullah Ocalanî, çar hetê dinyayî de û şaran rê zaf weş ame û hêvîya ma esta ke no proseso newe hetê şarê kurdî ra zî weş bêyro famkerdiş. Dewlete zî ganî gureyê xo biker o û verênî de zî ganî game bierzo. Ma zî ganî binê nê prosesi pir bikerê û raya demokrasi û aştî bêyro ronayîş. Ewta de çi gurew bibo û ganî ma zî nê gureyê xo bi rewşa layîqî ra bikerê.”
Dek û dolabê şerê taybetî berteraf kerdî
Hemwelatij Salih Açikguzî zî dîyar kerd ke, “PKK serra 1984 ra na het verba dewleta tirk tena şer nêkena, vera Natoyî ra zî şer kena. Ordîyê dewleta tirk orduyê Natoyî ra yê hîrêyîne ya û dinya de zî ordîyê heştîne ya. PKK heme hetira verba nê ordîyê ra, bi dek û dolabanê înan berteref kerdî.
Ganî ma fikr û felsefeye Rayver Apoyî weş fam bikerê
Açikguzî vatena xo nîya qedênê: “Verê veran piroseso ke newe bi destê Rayberê Şarê Kurdî Abdullah Ocalanî destpê kerdo tarîxî yo. Rayberê Şarê Kurdî Abdullah Ocalan kora beno se wa bibo, her wext nê rolê xo yê tarîxî kay keno.” Ma şarê kurd fikr û felsefeya Rayberê Şarê Kurdî Abdullah Ocalanî erey fam kenê û ma rewşa famkerdîşî ra daîmî tepîya manenê. Bawerîya ma esta ke, nê destpêka pêvajoyê neweyî ra şarê ma zaf paştî bido rewşa komelkîya demokratîkî û aştîye.
