Piştî banga dîrokî ya ku Rêberê PKKê Abdullah Ocalan a 27ê Sibatê kirî, Komîteya Rêveber a PKKê diyar kir ku ew beşdarî bangê dibin û wê guh bidinê. PKKê ji îro û pêve agirbest îlan kir
Mîna piştî banga Rêberê PKKê Abdullah Ocalan, daxuyaniya agirbestê ya PKKê jî di çapemeniya cîhanê de cihekî berfireh girt. Li seranserî cîhanê, ji dervey ajansên nûçeyan ên fermî yên Rûsya û Îranê Sputnik û IRNAyê, hema bêje hemû rêxistinên çapemeniyê nûçe weşandin. Servîsa Tirkî ya Sputnik jî nûçe bi zimanê medyaya alîgir, dît.
REUTERS
Reuters ragihand ku piştî banga Rêberê PKKê Abdullah Ocalan, PKKê agirbest îlan kir. Di nûçeyê de bal kişandin ser banga Rêber Apo ya 27ê Sibatê û diyar kirin ku 40 sal in şer dewam dike.
ASSOCIATED PRESS NEWS (AP)
Di nûçeya APê de hate diyarkirin ku PKKê di nava 2 rojan de agirbest îlan kir û daxuyaniya PKKê wiha da: “Ji bo Banga Aştî û Civaka Demokratîk a Rêber Apo bikeve meriyetê, em agirbestê îlan dikin. Heta ku êrîşî me neyê kirin, ti hêzên me çalakiya çekdarî nakin.”
FRANCE 24
Qenala nûçeyan a France 24 nûçe bi van gotinan servîs kir: “Em naveroka bangê qebûl dikin û em ê vê bişopînin û pêk bînin.”
XINHUA
Ajansa nûçeyan a fermî ya Çînê Xinhua nûçeya xwe weke flaş weşand û ragihand ku PKKê bi banga Rêberê PKKê Abdullah Ocalan re agirbest îlan kir.
AL JAZEERA
Al Jazeera diyar kir ku PKKê agibest îlan kir û got, “PKKê xwest ku lîderê wan Abdullah Ocalan ê di girtîgehê de, were berdan.”
JARUSALEM POST
Jarusalem Post a ku navenda wê Îsraîl e, îlana agirbestê ya PKKê bi xwînerên xwe re parve kir.
SKY NEWS
Televîzyona SKY News îlana agirbestê weke nûçeya lezgîn weşand.
BBC
BBCê bi nûçeya David Mercer re biryara agirbestê ya PKKê ragihand.
Sputnik
Servîsa Îngilîzî ya Sputnik ku ajansa nûçeyan a fermî ya Rûsyayê ye, nûçe ji nedîtî ve hat û servîsa Tirkî jî tercîh kir ku nûçeyê bi zimanê medyaya alîgir bibîne.
DW, CNN International, Al Arabiya, Bloomberg, The Washington Post, The Times Of Israel û gelek rojname, televîzyon û malperên nûçeyan biryara agirbestê ya PKKê parve kirin.
