Tarîx ra nata şarê kurdî vera zilmê dagirkerdoxan de zaf rayan sereyê xwu wedarto. La çi heyfo ke bêtifaqîye ver heme serewedartişê kurdan binkewtê û badê ci zî kurdan derbeyê zaf giranî werdê.

Heta nika bêtifaqîye ver zaf serek û rayberê ma kurdan amê daliqnayîş û kiştene, jîr û alimê ma amê surgûnkerdiş, pêşeng û zanyarê ma amê hepiskerdiş. Inahawa bêtifaqîye ver şar, welat, ziwan, kultur û estbîyayîşê ma ameyê înkarkerdiş. Reyna bêtifaqîya ma kurdan ver welatê ma (Kurdîstan) hetê dagirkerdoxan de ameyo vêşnayîş û letekerdiş. Bi kilmekî ma kurdan heta nika bêtifaqîye ver zaf zilm dîyê û her hetî ra zî vîndî kerdê.

Eke nika merdim fekê kamcîn hetê kurdî abikero, bi arizî zî hetê sîyasî, heme vanê, ma kurdan verê cû bêtifaqîye ver vîndî kerdê, aye semed ra ma nika bindest ê. Reyna vanê, heme bobelet û terteleyê ke ameyê sereyê şarê ma bêtifaqîye ver bîyê.

Yanê şar û sîyaset û heme hetanê kurdan êdî dirbeteya xwu fam kerde. Labirê ke ma nêweşîya xwu fam kerde reyna zî ma nêeşkenê peynîya bêtifaqîye bîyarê. Çimkî ma binkewtiş û xeletiyanê xwu ra ders nêgênê, yanê hende bobelet û felaketê ke bêtifaqîye ver ameyê ma ser o, reyna zî ma biaqil nêkerdê. Eno bêtifaqîye xêyrê kurdan ra nîyo, eksê ci kurdan vera dişmenan de bêhêz keno.

Dinya de yew şar çin o ke bawerî, îdeolojî û ewnîyayîşê înan ê dinya heme seypê bo, xwura çîyêk wina mumkin zî nîyo. Ma kurdî zî seke heme şaranê cîhanî hetê sîyasî, fikr, bawerî û îdeolojîk de yewbînan ra cîya yê, ena çîyêko zaf xozayî yo. Enê serranê peyênan de mîyanê kurdanê ma de zî fikrê netewperwerîye vila bîyo. Kes û hetê kurdî yê ke xwu neteweperwer vînenê, hertim qala muhîmîya yewîye kenê û vanê, seba xelasîya welatê ma ganî hizb û partîyê kurdan bibê yew. Raşta ci hetê sîyasî û îdeolojîkî de yewîya kurdan asan û mumkin nîyo, coka ra zî mi gore yewîye ra vêşêr hewcedarîye ma bi tifaqê est o. Yanê wa her partîya ma goreyê xwu yew îdeolojî û bawerîye bipawo, wa her hizba ma goreyê xwu yew rayîr û serek biweçîno, la ganî peynî de heme hetê kurdî semedê azadî û xoserîya şar û welatê ma bêrê têhet, kombîyayîşan virazê û yewbînan reyde bi tifaq bê. Çimkî tenya tifaqa mîyanê kurdan de eşkena kurdan bindestîye ra xelas bikero û biresno armancê înan.

Kurdîstan keyeyê ma heme kurdan o, ena ray eke ma keyeyê xwu bê keyberî û pace verdê o çax duşmen do bikewo keyeyê ma û mîyanê endamanê keyeyî de fesadîye virazo û dizdîye bikero. Yanê eke hizbe û partîyê kurdî mîyanê xwu bitifaq nêbî, o çax duşmen zaf asan eşkeno bikewo mabênê înan û bi înan kay bikero. Coka ra zî nêbeno ke hizb û partîyê kurdî yê ke dawa xoserîya welatî kenê, vera duşmenî de yewbînan ra cîya cehd bikerê, çimkî seke pîlanê ma vato, mêşnaya ke kerî ra cîya biba, do biba para vergan.

Aye semed ra zî seba ke ma nêbê werdê vergan ganî hizb û partîyê kurdî vera duşmenî de mîyanê xwu yew tifaq virazê û pîya bixebitê. Yanê ma kurdî tenya bi tifaq eşkenê aver şirê û xwu galeyanê duşmenan ra bipawê. Xora destêkî tenya ra veng nêvejîyeno, ma bi pîya bihêz ê.

Sey şima zî zanenê enê rocanê peyênan de hizb û partîyê kurdî yê Bakûr û Başûr û Rojawanê Kurdîstanî yewbînan reyde ronîşenê û seba ameyoxê welatê ma kombîyayîşan virazenê. Kombîyayîşan dima zî temsilkarê hizban razîbîyayîşanê xwu mojnenê û vanê dîdarê ma zaf weş vîyartî, nika ra dima zî do dewam bikerê. Bêguman ma sey şarê kurdî bi enê cehdanê partîyan ê kurdî yê semedê tifaqê daxilî zaf zerrîweş benê û ma hêvî kenê ke dewam bikerê. Raşta ci nika hertim ra vêşêr hewcedarîya ma ya tifaqî est a. Yew vateyê ma yê verênan est o, vano: “Tifaq eşkeno dewlete bîyaro la dewlete nêeşkena tifaqî bîyaro.” Ena ray seba ke ma kurdî zî nika bindest ê, sey nan û awe hewcedarîya ma bi tifaqî est a, çimkî ma baş zanenê bê tifaq xelasîya kurd û Kurdîstanî çin a. Aye semed ra kom kî semedê tifaqê kurdan cehd bidê û bixebitê ma zî do paştîya înan bikerê. Reyna ganî ma kurdî zî seba azdî û xoserîya welatê xwu verê partîyanê xwu yê kurdî bidê yewbînan û înan mecburê tifaqî bikerê û ma înan rê bivajê, gama ke şima bibê koye nêeşkeno vera şima de vindero.

Hêvî û waştişê mi oyo ke hetê kurdî tifaqê xwu virazê û azadîye bîyarê ney welatî.