Amed de Hemserekê Komeleya Cigêrayîşê Ziwan û Kulturî yê Mezopotamya (MED-DER), Enstîtuyê Kurdan û DBP bi wesîleya 21ê Sibate Roja Ziwanê Dayîke rayîrşîyayîş kerd.
Hemwelatîyê ke beşdarê rayîrşîyayîşî bîyî; Memet Bulut, Hamît Şalo, Reşît Sumbul, Xidir Karataş û Dogan Taşkinî derheqê Roja Ziwanê Dayîke de qisey kerd.
Memet Bulutî va: “Roja Ziwanê Dayîke ya Dinya, heme miletan rê û bi taybetî kurdan rê pîroz bo. Ziwan zaf muhîm o, bê ziwan cuye nêbena. Ziwan ziwanê dayîke yo, ma senî qîmet danê dayîka xo, ganî ma wina zî wayîrê ziwanê xo vejîyê. Kirmanckî ziwanêko weş û hîra yo. Ganî ma ziwanê xo heme cayan de bişuxulnê, nêke ziwanê ma vîndî beno. Kirmanckî de nêrî û makî de zaf dewlemendî est a, kurmancî de wina nîyo û kirmanckî zaf keheno.”
Kurmancî zî ganî zazakî bander bibê
Ma ganî her tim lehçeyê xo reyde qisey bikê bê tersî û bê şermî. Kurmancî zî ganî lehçeye zazakî bander bibê. Çîmkî dinya de zaf ziwanî ver bi mergî de yê nê ziwanan ra yew zî zazakî yo. Memet Bulut wina qedêna: “Ma ganî wayîrê ziwanê xo bivejîyê. Heme waran de kuçeyan de, bazaran de qalî bikerê û kurmancî zî ma ra biewnîyê û bander bibê. Eke heta ewro kurmancî zazakî bandernêbîyê, o zî kemaneyê ma yo. Çimkî her wext ma kurmanca reyde kirdasî nê ganî zazakî qisey bikê. Yewna hewa zazakî sernêkeweno.
“Ganî ziwanê ma vîndî nêbo”
Hamît Şaloyî qeyd kerd ke statuyê kurdan çin o û dewleta serdestan ziwan qedexe kena. Va: “Mekteban de heme ziwan yeno perwerdekerdene, la kurdkî nê. Ma ganî keyeyan de, koyan de û bazaran de ziwanê xo qisey bikê.”
Reşît Sumbulî va: “Ziwanê ke binê tehluke de yê, ganî ma înan rê wayîrîye bikê. Problemo tewr gird problemê kirmanckî yo û no problemê heme kurdan o. Kurmancî zî ganî kirmanckî bander bibê.”
Xidir Karataşî va: “UNESCO’yî 17ê sibata 1999î de 21ê Sibate kerd Roja Ziwanê Dayîke ya Dinya. Ziwan estbîyayîşê netewe, kultur, însan û tarîxî yo. Eke ziwanê to çin bo, ti zî çin ê.”
Dogan Taşkinî zî wina qedêna: “Sûka Amedî de di mîlyonî însan ciwîyenê. Seba sîyasetî ra se hezarî yenê têhet la seba ziwanî tena 300-400 kesî. Ganî xebata ziwanî sîyasetî ra hîna averêr biba.
