Îdarekerê Rêxistinê Amedî yê DEM Partî Ramazan Karakaya, qewimyayişê peynî ser o rojnameyê ma rê derheqê rewşa Rojhelatê Mîyanênî û pêvînayişê Îmraliyî de qisey kerd. Ey va ke bi destpêkerdişê şerê Îsraîl û Filistînî ra dima Beyrut û Îran ancî zî Surîye de rewşe vurîya. Amerîka û Îngilîstan seba projeyê dîzaynkerdişê sînoran newe ra dest bi kar kerdî û no semed ra Tirkîya tedirgîn bîya.

Ramazan Karakayayî dîyar kerd ke Rojhelatê Mîyanênî de bi serkewtişê Mîyanneteweyî û vurîyayîşê sînoran ra kurdî do bibê wayîrê yew statuyî. No statuyê kurdan seba şirîkê îqtîdarî AKP-MHP felaket aseno. Bahçelî meclîs de destê DEM Partî tepişt û va wa Abdullah Ocalan bêro meclîs de qisey bikero.

“Ez eşkena çareser bikera”

Ramazan Karakayayî ard ziwan ke heyetê DEM Partî Abdullah Ocalanî reyde pêvînayîş kerd û dima partîyanê bînan reyde zî pêvînayîşî viraştî. Pêvînayîşî de Abdullah Ocalanî va “Ez eşkena nê pirsgirêkê hezar serran çareser bikera û ez wayîrê îradeya ke do şarî paştî bido ya.”

Ramazan Karakayayî îfade kerd ke netîceyê pêvînayîşan de Ocalan samîmî aseno la îqtîdar samîmî nîyo û sey her wextî rewşa şerê taybetî xebitneno. Yew hetî ra vanê “wa şer nêbo” la hetêk ra zî êrîşê Rojawayî kenê, sivîlan, rojnamegeran û hunermendan qetil kenê. Vakurê Kurdistanî de qeyuman erzenê, operasyonanê qirkerdişê sîyasîyan kenê. Operasyonê peyênî de hemserekê ESP û nizdîyê 40 endamî tepişîyayî û zaf muhafîlî ameyî tewqîfkerdiş.

Wazenê vengê muxalîfan birnê

Ramazan Karakayayî peynîya qiseykerdişê xo de va ke armancê nînan o yo ke vengê muxalifan, şorişgeran û sosyalîstan birnê û destê Abdullah Ocalanî zeyîf bikerê. Ey va ke nê semed ra rewşa qirêjî qet mumkin nîya. Şarê kurd vengê xo vera şorişê sosyalîstan ra hîna berz dano û ganî heme kes Abdullah Ocalanî verde saf bigîrê.