Seke zanîyeno Bahçelî no hewte kombîyayîşê grûba xo yê parlamentoyî de hêrişê şexsîyetanê kurdan kerd. Şêx Seîd û Seyîd Rizayî rê heqaretî kerdî. Ey vat ke “nê şexsîyetî neyarê Komara Tirkîya yê û xayîn ê.” Na babete ser o Komela Şêx Seîdî ra tornê Sêx Seîdî Mehmet Kasim Firatî rojnameyê ma rê tayê ercnayîşî kerdî.

Firatî ard ziwan ke Şêx Seîd û embazê ey şexsîyetê taybet û pîroz ê û wina qisey kerd: “Ê her wext doza kurdan ra wayîr vejîyayî û neheqî qebûl nêkerde. Wexto ke serra 1924î de qanûno bingeyî yê  tirkan virazîya û saz bî, nîjadperestî virazîyaye. Yew dewlete, yew ale, yew ziwan, yew şar, kultur û nasname ame awankerdene. Estbîyayîşê kurdan ame redkerdene. No sebeb ra zî Şêx Seîd û embazanê ci çinkerdişê kurdan qebûl nêkerd. Şêx Seîdî vat ke ‘dîrok de ziwan û kulturê ma est o û ma wazenê ke meseleya kurdan bêro çareserkerdene’. Na rewşe wezîfeyê îslamî yo. No sebeb ra zî qezaya Pîranî ya Amedî de dewleta tirke yew provokasyon viraşt û şerêko germ qewimîya. Şeş serrî yo ke xebata komela ma est a, ma wazenê cayê mezelanê şehîdanê ma dîyar bo. Nê warî de ma doze akerde. Hema zî  wezaretê karanê zerreyî yew netîce nêdaye. Ma na rewşa wezaretî qebûl nêkenê. Ma ganî emekdaranê xo ra wayîr vejîyê. Komela ma xoser a û girêdayeyê yew îdeolojî nîya.”

Firatî qiseykerdişê xo wina dewam kerd: “Bahçelî nîjadperest o û yew çîyo eceyîb nêvato. Vatişê Bahçelî hewayê her wextî rewşa normal a. Bahçelî waşt ke rojdemî meşgul bikero û şexsîyetanê kurdan rê heqaret bikero. Ganî ma zî firsend nêdê înan. Dinya wazena ke rojdem de yew çîyê neweyî virazo û nê warî de mecbûr ê ke kurdan reyde têkilî virazê. Rojhelatê Mîyanênî de eke yew pêameyîş virazîyo, kurdî aktorê na cografya yê. Kurdî zî ganî wayîrê ziwan û nasnameyê xo bivejîyê. Bi hezaran şehîdê ma est ê û ma wayîrê şehîdanê xo bivejîyê. Ma rewşa teslîmîyetî nêwazenê, rewşa aştî wazenê. Kurdî ganî yewbîyayîşê neteweyî bivirazê.  Nê warî de çi ma ser bikewo û ma heme bedelan ra hedre yê. Şêx Seîd û Seyîd Riza rûmetê ma yê.”