Qeyûmê Sûrî yê Amedî nameyê taxa Kitilbîlî roniştoxan ra bêxebere kerd ‘fetîh.’ Roniştoxanê taxe vera ney nêrazîbîyayîşê xo mojna û vat: “Ma do nameyê taxa xo nêvurnê. Eke hewce bibo ma do şorê mehkeme.”
Qeyûmê Sûrî yê Amedî nameyê taxa Kitilbîlî vurna kerd ‘fetîh.’ Taxa Kitilbîlî taxanê tewr kanan ê Kurdîstanî ra yew a û qesê 400 serrî ya. Goreyê vatişan Kitilbîl de verî armenîyî û sûryanîyî ciwîyayêne.
Taxe seba Unîversîteya Dîcle 1962î de pê îstîmlakî ameye vengkerdene. Nika taxe de qadê 10 hezar kesî ciwîyenê.
Roniştoxanê taxe vera kerdişê qeyûmî nêrazîbîyayîşê xo mojna û da zanayene ke bê xebera roniştoxan nameyê taxe vurîyayo. Roniştoxan ra Fesîh Karakuzuyî pare kerd ke keyeyê ci 200 serrî yo Kitilbîl de ciwîyeno û vat: “Di rojî verî mixtar gêra mi û vat name vurîyayo. Ê verî ke rizaya merdiman bigêrê û nameyê cayanê ma bivurnê. Nameyê nê cayî 400 serrî yo Kitilbîl o. Ê hûrmetê ma nêkenê coka ma ra nêpersenê.”
Karakuzuyî eşkera kerd ke îstîmlakî ra dima erazîyê taxe daxîlê unîversîte ameyê kerdene û vat: “Binê erdî de gorê ma est ê la erdê ma ame îşxalkerdene. Serê goran de kafeyî est ê. Înan erazîyê ma girewtî û ma dayî koçkerdene. Ma do nameyê taxa xo nêvurnê. Eke hewce bibo ma do şorê mehkeme. Binê nê kerdişanê înan de çîyo bîn est o. Ma do destûr nêdê ney.”
