Tepişteyo nêweşo ke vera zextan xover dano: Pepûk!
Tepişteyo neweş Cengîz Sînan Halîs Çelîko ke 25 serrî yo vera îşkence, zext, tecrîd, surgun û hende nêweşîyan xover dano şîîra xo de xo sey Pepûk name keno.
Cengîz Sînan Halîs Çelîko ke Zîndanê Sîlîvrî de yeno tepiştene nêweşo giran o. Çelîk 1974 de Xozatê Dêrsimî de ame dinya û 1997î de Agirî de pêkewtişêk de ame tepiştene. Çelîk bi halê xo yê birîndarî 54 rojî nezaret de îşkenceyê giranî dîyî û dima ra ame tepiştene. Çelîko ke Mehkemeya Asayîşî ya Dewlete de ame muhakemekerdene cezaya muebedî dîyaye ci. Çelîk 25 serrî yo zîndan de yeno tepiştene û heta nika zîndananê Erzirom, Giresun, Kirikkale, Sîncan, Tekirdag, Mugla, Metris de mend.
Zîndan de bi ziwanê xo yê dayîke kirdkî ( zazakî/kirmanckî) û tirkî şîîrî nuştî û xebate ci yê resîmî pêramotişanê welat û teberê welatî de ameyî ramojnayene. Rojname û kovaran de şîîre, nuşte û makaleyê ci ameyî weşanayene. Hîrê rey Aktîvîteya Edebîyatî ya Huseyîn Çelebî de û rayêke Aktîvîteya Resîm, Şîîre û Hîkaye ya Komeleya Heqanê Merdiman a Çewlîgî û Festîvala Kultur û Hunerî ya Yilmaz Gunayî de xelatî girewtî.
Serra newî kitabê ci yê şîîran bi nameyê Serdestan Weşanxaneyê Ayrintiyî ra vevjîya. Çelîk kitabê xo de qala tarîxê kurdan, qala armînîyan, Urartu, îparatorîya Medîî, Hurriyan û bawerîya zerduştîye û xeylêk çîyanê bînan keno. Kitab de derheqê Qirkerdişê Roboskî de zî şîîrêke esta. Çelîko ke 25 serrî yo vera îşkence, zext, tecrîd, surgun û hende nêweşîyan xover dano şîîrêka xo de xo sey Pepûk name keno.
Çelîk rîyê îşkenceyî ra nêweşîya epilepsî girewt. Xeylêk cayanê ci de parçeyê şarapnelî estê, seba ke rîskê felcî esto nêameyî girewtene. Rîyê nînan ra tim nobetanê dergan ê epîlepsî vernêno. Pîya bi nêweşîya kasnerî nêweşîyê ci yê giranî bînî zî estê. Çelîk lîsteyê nêweşanê giranan ê Komela Heqanê Merdiman de yo. Keye û rêxistinanê komelê sîvîlî xeylêk rey veng da ke wa bêro veradayene la ne ame veradayene ne zî nêweşxene rinda ame tedawîkerdene. Rixmo ke raporê ci yê zîndan de nêeşkeno vindero esto zî nîno veradayene. Çelîk zaf rey huce re tena mend û dermanê ey nêmaeyî dayene. 2016 de gama ke semedê tedawî ameyêne berdene Zîndanê Metrisî raştê hêrişê tepişteyanê edlîyan ame, 22 cayanê xo ra derbî girwtî û linga ci ya çepe rê platîn ame pakerdene. Seba ke esteyê ci nêgirîya nêeşka rayîr ra şiro. Masûlkeyê ey helîyeyî û kîlo kerd vînî. Rîyê hêrişî ra xeylêk nêweşîye bînî zî vejîyayî la rixmê naye hema ke nêameyo tedawîkerdene peyser zîndanî rê ame şawitene. Reyna xeylêk rey krîzî ravernayî û nê halê xo yê giran de raştê hêriş û tacîzê gardîyanan ame.
Waya Çelîkî Nesrîn Çelîka ke Ajansê Mezopotamya rê qisey kerd semedê birayê xo vana o zaf hunerî ra hes keno, domanîya ci ra resîm, şîîre û tîyatroyî rê eleqaya ci estbî,vengê ci zî weş o û saz cineno. Nesrîne Çelîk vat: ”Birayê mi rixmo ke 25 serrî yo zîndna de yo ez çiwext şina cayê ey çimanê ci de heskerdişê cuya vînena. Rixmê heme zehmetîyan bi hunerê xo ê dêsan rijneno. Pê şîîran hem derdê xo hem problemanê komelkî ano ziwan. Birayê mi tim vano yewna dinya mumkun a. Kitabo ke nuşto nêdîyeno ci. Serê înan de zaf îşkence zextî estê. Zaf dejî estê la vera nînan yew xoverdayîş zî esto. No têkoşîn hînî dêsan ra ravêrto. Pê nêtkoşînî çew nêeşkeno bêro tepiştene.”
