Rejîmê Erdoganî êdî teslîmê ergenekonperestan bîyo. Gama ke serra 2013î de bêrayîrîyê Erdoganî eşkera bîyî, rejîmê Erdoganî pê ergenekonperestan peymanêke kerde. Erdoganî vat ke “şima mîyaneyê mi bihurnê, ez zî ê şima bihurnî”. A serre nata Kurdistanî ser o “faşîzmo alaturka” yeno caardene. Erdogan nêame muhakemekerdene û vernîya çînkerdişê Kurdistanî akerde. Artêşe, mafya û burjuvazîyo tirk o ke wazenê ke kurdan îmha bikerê nika bi azadî polîtîkaya qirkere rayra benê. Çiqas ke Erdogan îqtîdar de bimano, nîjadperestîya nê dînamîkan do dewam bikero.
Weçînayîşê gulana 2023î ra tepîya tayê taktîkê dewleta tirke bedilîyayî. Xora polîtîkaya demê newî merasîmê sondwerdişî yê Erdoganî de eşkera bîye. Merasîm de her tewir merdim estbî û mendêne “keştîya Nuhî”. Serekkomarê Venezuela Nîcholas Maduro, Serekwezîrê Armenîstanî Nîkol Paşînyan, Serekkomarê Azerbaycanî Îlham Alîyev, Serekê Îdareyê Herêma Kurdistanî Neçîrvan Berzanî, Serekê Partîya Vatanî Dogu Perînçek, Serekê Karanê Dîyanetî Alî Erbaş ûsn. tewrê merasîmê “hukumdar Erdoganî” bîyî. Nê nameyî şertanê normalî de nênê têhet. “Eke verg û verek/vereke yenê têhet, daristan bêşik vêşeno”. Merasîm de fotografê Perînçekî û Alî Erbaşî xeylê bale antbî. Uca de qiseykerdişê Maduroyî zî balkêş bî. Maduroyê “sosyalîstî” Erdogano “faşîst” kerd verara xo û bi heşmetkarî “embazê xo” goyna. Ey vat ke “Tirkîya de no termîn weşhalîye û averşîyayîş do bibo”. Maduro sosyalîst nîyo, bibo bibo kinitoxê gorê sosyalîzmî beno.
PDK kermê Kurdistanî yo
Merasîmê sondwerdişê Erdoganî de sîyasetmedaro tewr rengin bêguman “Neçîrvan Berzanî” bî. Keyeyê Berzanî, rejîmê Erdoganî yo gonîn vera kurdan kamcî qetlîyamî keno wa bikero zêde eleqedar nêbeno. Merdim eşkeno vajo ke PDK sey walîyîya herêmî ya dewleta tirke xebitîyeno. Na partîye Başûrê Kurdistanî girêdana îdareyê Erdoganî. Seba ke têgêrayîşê kurdan bêro çînkerdene, Erdoganî reyde her hemkarîye kena. Rixmo ke zana mabênê Erdoganî û Saddamî de cîyayîye çîn a, oncîna Erdoganî rê hetkarîye kena. Yanî Saddamê newî weye kena. PDK kermo ke Kurdistanî koçineno yo.
Pêvînayîşê Yapicioglu û Berzanîyî
Weçînayîşî ra dima îqtîdarê AKP-MHPî vera kurdan konseptê şerî yo newî aferna. Wina aseno ke nê demê newî de Huda Par û PDK do pîya bêrê şuxilnayene. Verê ke weçînayîşî nêameyî kerdene, Sereko Pêroyî yê Huda Parî Zekerîya Yapicioglu şî Hewlêr û pê Serekê Pêroyî yê PDKyî Mesut Berzanî pêvînayîşêk kerd. No pêvînayîş medya de xeylê ame nîqaşkerdene. Mîyanê nê dide kurdanê hemkaran de beno ke hemverê têgêrayîşê kurdan tayê babetî ameyî qiseykerdene. Ê wazenê her ercê kurdan teslîmê cerganê Erdoganî bikerê. Tarîx do nameyanê înan zerreyê lîsteya xîyanetkaran de binuso. Sene ke kurdî xîyanetê Harpagos û Rayberî xo vîr ra nêkenê, xîyanetê keyeyê Berzanî zî do nêro xovîrrakerdene.
Festîvala Cîloyî de destê PDKyî
Rolê PDKyî nê rojan “Festîvala Cîloyî” de zî eşkera bî. Yeno zanayene ke qeyûmanê Erdoganî yê heramîyan qezaya Geverî ya Colemêrgî de Koyê Cîlo yê Satî û Gola Satî ya Cemedî de aktîvîteya bi nameyê “Festîvala Cîloyî” serûber kerde. Rixmo ke na festîvale “aktîvîteya kulturî” bîye, fermandar, qaymeqam, walî û medyaya seraya Erdoganî “propagandaya gemarine” kerde. Rojnameyanê sey Yenî Şafak, Aydinlik ê ke nêzdîyê seraya Erdoganî yê “tirkperestîye” kerde û “tabloyê keyfweşîye” viraşt. Festîvala kolonyalîstan de dide organanê weşanî zî bale antêne: Rûdaw û Kurdistan 24. Nê dide organî her tim xizmetkarîya Erdoganî û faşîstan kenê. Cayêkî de vera têgêrayîşê kurdan aktîvîteyêke bena, şinê û tewrê ci benê. Ê her tim leteyê propagandaya lêşine ya dizdan ê. PDK qestî nê organê weşanî erşawitî. Çike PDK esparê Erdoganî yo.
Weqfê Hetkarî yê Berzanî
Têkilîyê mîyanê PDK û îşxalkeran pjinde nênê peydakerdene. Her aktîvîte û game goreyê stratejîyêkî qewimîyenê. Çend rojî verî Efrîn de bi destê Weqfê Hetkarî yê Berzanî merkezê kulturî abî. Abîyayîş de şayîye û “zerreweşîya balkêşe” estbî. Merdim ge-ge wina perseno “gelo keyeyê Berzanî na dinya de nêciwîyeno?”. Serebûtê ke Efrîn de qewimîyayî qet nê keyeyî eleqedar nêkenê. Şaristan ame îşxalkerdene û raştê tirkkerdişê giranî ame. Bi hezaran kurdan bajarê xo caverda. Ziwan, kultur û xoza ameyî talankerdene. Her cayê Efrînî de cergê Erdoganî heramîye ramnenê. Weqfê Berzanî şono û uca de şayîyan serûber keno. Tîya de hem bomîye hem hemkarîye hem zî xayînîye esta.
