Şaristananê Bakurê Kurdistanî de wisar zerreweşîya merdimî zêdîneno. Her şaristan sey vilike boyêka weşe vila keno. Gama ke merdim koyan rê ewneno, gandarbîyayîşê xoza zerrîya ci ra hîs keno. Seke vayê azadîye koyan ra axmeyê kuçeyan beno. Şar nê vayî keyeyanê xo de sey zerdê qîymetinî paweno.
Şaristananê Kurdistanî ra yew zî Çewlîg o. Yanî welatê hunermend û dengbêj Rencber Ezîzî. Kilamê Rencber Ezîzî hema zî mîyanê kirmancanê/zazayanê Çewlîgî de xeylê tesîrdar ê. Ezîz kilamêka xo de wina vano: “Kurdistan cenetê/behiştê kurdan o.” Çewlîg zî behişt de baxçeyêk o. Nê baxçeyî de nê rojan vengê azadîye berz beno. Çimanê şarî de zaf hîsê zobîninî yenê ferqkerdene. Wina aseno ke bi serran o xizanîye, teda, îsraf, bêrayîrîye û bêedaletîye şarî ser o tesîrêko negatîf kerdo.
Namzedî xeylê enerjîk û bizanayîş ê
Parlamenterê Çewlîgî yê Partîya Çep a Keske Omer Faruk Hulaku, Cemîle Turhalli Balsake û Faruk Arîs problemanê şarê xo xeylê baş zanê. Hulaku û Turhalli avukat ê û namzedê ciwanî yê. Înan de enerjîyo gird û vêşanîya serkewtişî esta. Mamoste Faruk Arîs hetê edebîyatî ra xeylê merdimo bizanayîş o. Hem ziwanê tirkî hem zî kirmanckî de xeylê eleqeder o. Eseranê Malmîsanij, Munzur Çem, Roşan Lezgînî nêzdî ra teqîp keno. Kirmanckîya ci zî bala merdimi anjena.
Şarê Çewlîgî wayîr vejîya
Şarê Çewlîgî wayîrê namzedanê xo vejîyeno. Kuçeyan de înan bi keyfweşîye pêşwazî keno. Şar êdî wazeno ke peynîya “otokrasîyê” Erdoganî bêro. Nê semedî ra weçînayîşê 14ê Gulane zaf girîng ê. Yan kurdî biresê weşhalîye, yan zî xizanîye û polîtîkaya qirkere dewam bikero.
Çewlîg de mîtîngêko gird
Mîtîngo gird o ke merkezê Çewlîgî de qewimîya bala paştîdayoxanê Partîya Çep a Keske antbî. Rixmo ke raşteyê mîtîngî qij bî, tewrbîyayoxan dormeyê barîyeran de cayê xo girewt. Vera mîtîngî eleqe xeylê zaf bî. Key ke namzedan qisey kerd, coşê tewrbîyayoxan berzêr bî. Hîrê namzedan zî qala zulm û polîtîkaya zordeste ya hukmatê Erdoganî kerd. Înan seba qedînayîşê zulmî weçînitoxan ra rayî waştî. Mabênê namzed û weçînitoxan de “têkilîyêka nêzdî” estbî. Nê têkilîyî zî mojnenê ke Çewlîg de awanîya komelnasî ya weçînitoxan vurîyena. Demê ameyoxî de partîyê kanperest, nîjadperest û îslamperestî qetî do estbîyayîşê xo vîndî bikerê.
