Qezaya Dara Hênî ya Çewlîgî de cenazaya Teyfîk Kaynarî yo ke perey ra nata tira xebere nêameyêne girewtene, dîyaye.
Eşkera bî ke Kaynaro 79 serrî pê çeke kişîyayo.
Dewa Şeganî ya qezaya Dara Hênî ya Çewlîgî de Teyfîk Kaynar perey dima ke keyeyê xo ra vejîya, tira xebere nêameye girewtene. Keyeyê ey naye ser o xebere daye cendirmeyan.
Cigêrayîşî ra dima cenazaya Teyfîk Kaynarî baxçeyê ey de ameye dîyene. Eşkera bî ke camêrdo kokim pê çeke, paştîya xo ra kişîyayo û cenazaya ci ameya kerdene binê erdî.
Cenazaya camêrdî wedarîyaye morgê Nêweşxaneyê Nêweşîyanê Domanan û Cinîyan ê Çewlîgî.
Derheqê serebûtî de tehqîqat dîya destpêkerdene. Ferdanê keyeyî ra tay kesî zî ameyî berdene bi îfadeyî.
