Îqtîdaro faşîst ê AKP-MHPyî bi nizdîbîyayîşê weçînayîşî çapemenîya azade û medyaya sosyale asteng keno. Her ke weçînayîş nizdî beno qedexe û zextê serê rojnamegeran û muxalîfan zî zêdîyeno. Seba birnayîşê vengê muxalîfan rojnamegerî yenê destbendkerdiş û tepiştiş, hesabê medyaya sosyale yê rojnamegeran yenê girewtiş û her vengêk o ke eksê înan de yo yeno birnayîş. Bi desan rojnamegerî nika zîndananê Tirkîya û Kurdistanî de yenê tepiştiş. Îqtîdar hewl dano ke pêro rojnamegeranê muxalîfan cikero zîndanan ke xo rê weçînayîşêko bi dek û dolaban pirkerde pê hadre bikero. Seba weçînayîşêkî bi zerrîya xo zî zemîn hadre keno û pêro îmkanê welatî seba menfaetê xo kerdo dewre.
Tena no hewte hesabê Twîtter û Telegramî yê Ajansê Mezopotamya, Xwebûn, Welat, rojnamevan Erdal Er û nuştoxa ma Helîn Uzele zî tede xeylêk adresê URL û malperî ameyî astengkerdiş. Bi waştişê Mudirîya Pêroyî ya Polîsan, Mehkemaya Cezaya Sulhî ya 4. ya Anqara 340 hesabê Twîtter, Telegram, Youtube û malperî asteng kerdî.
Bobelate de zî menfaetê îqtîdarî
Nê rojanê dejinan ê ke bobelata seserre qewimîyaye de zî rîyo raşt ê îqtîdarî reyna vejîya orte. Şewa 6ê Sibate de saet 04.17î de merkezê ci qezaya Bazarcixî ya Mereşî de bi girdîya 7.7î erdlerzêk qewimîya. Erdlerzî 11 bajaran ser de tesîrêko giran viraşt. Îqtîdarî hema ekîbê xelisnayîşî nêresabî herêma erdlerzî OHAL îlan kerd. Bobelata ke pê ameye de zî îqtîdarî fek teda, şîdet û menfaetanê xo ra vera nêda û waşt ke kontrolê herême bigêro dest. Yanî na bobelate zî xo rê kerd firsend. Heta 3 aşman nê herêman de do rewşa îstîsnayî dewam bikera û şar nêşiko vengê xo bikero. Goşeyê bînî yê dinya ra ekîp û ekîpmanî ameyî herêma erdlerzî, la dewlete yanî rejîmê yew camêrdî badê 3 rojan şî herême. Şîyayîşê ci de zî protokol ame hadrekerdiş û rayîrî seba ci ameyî abirnayîş. Şaro ke na rewşe dîye reaksîyon mojna. Ey vat ke nê rayîrî ganî seba hetkarî û xelisnayîşê merdiman bêrê şuxulnayîş, şar binê xirban de paweyê xelisnayîşî yo û beno ke seba înan herey bibo.
Erdogan û sazbendê ci
Hetêk de îqtîdar zîndanan bi muxalîfan pir keno û hetê bînî de Kurdistan de nêverdeno ke bê desturê ci çîvîkêk bifiro. Îqtîdarî bobelata ke goreyê dayeyanê fermîyan heta nika 43 hezar û 556 kesî merdî de zî qusurêkê xo nêdî. Badê 3 rojan Erdogan û sazbendê ci şîyî herême. Sazbendê ci yê ke şîyî zîyaretê mexduranê erdlerzî yê Riha yarîyî kerdî û cayo ke dejêko gird yeno cuyayîş de huyayî. Ewja de asîya ke no îqtîdar dejê şarî hîs nêkeno.
Înan dejê şarî nêdî
Nê îqtîdarî xo rê wina nêvat: “Bi des hezaran kesî binê xirban de yî, ma bîyî sebebê mergan, ma kontrolê awanîyan pê nêard, ma seba menfaetanê xo mutahîdî verdayî herêman, laşê şarî parçe parçe bîyo, înan ra leteyêk bira nîno dîyîş, tewrê xirban bedenê parçekerde erzîyenê eşteyan, bi bedenê merdiman û xirban koyêk virazîyayo, mezelê şarî çinî yê, nameyê cenazeyan çinî yê, nêweşxaneyî bi cenazeyan û birîndaran dekerdeyî.” Tu selahîyetdarêk nê çîyî nêdîyî û nêvat ke ma karê xo baş pê nêard û coka ra ma hîsin î yan zî qusurê xo wazenê. Fikirîyayîşê nê çîyan wijdanî yo û verê dewleta tirke dewletê bînî resayî hetkarîya herême. Nika ma vanê, gelo na dewlete seba çi esta? Seba çinîkerdişê kurdan û şarî esta yan zî seba menfaetanê xo?
