Sera 2022 zî şîye. Erê, ma serêke zî temam kerde. Di ene sere de rewşa kirmanckî senîn bîye? Ma hetê kovaran ra bawnê rewşa kirmanckî ra. Verî ene joy, ma serê kovaranê kurdî de çende malûmatan bidê.
Bakur û Tirkiya de bi namey Destar, Dilop, Nûbihar, Zarema (bi hûmara 16’inan xatir waşt, hamî girotişî) û Zend kovarê bi kurdî estê. Enî serê wêje, çand, ziwanî de weşaney xwu kenê. Enî bi kurmancî yê, tay kirmanckî niştey eniyan de vecênê.
Xeynê eniyan enî kovarî estê:
“Bar” kovara şîîran a. “Dadistan” serê hiqûqî de kar kena. “Dîyalog” hetê şanoyî de weşaney xwu dewam kena.
Kovara serê folklorî de “Folklora Me”, kovara serê folklor û ziwanî de “Folklor û Ziman”, kovara serê hîkayeyan de “Kurdeçîrok”, Kovara serê tarîxî de “Kurd Tarîhî” esta. Reyna kovara serê açeryayîşê şîîran de “LEWerger” emsar vecîyaye.
Kovara akademî “Na Akademî” niştanê akademîk kena vila.
Kovara serê felsefe de “Philosophia” û kovara serê psîkolojî de “Psycology Kurdî” weşaney xwu dewam kerd.
Tay-zehf, yew an her wextê xwu de, bi awaykê enî kovaran emsar xwu resna verê wendoxanê xwu. Enî zî bi kurmancî yê, tay kirmanckî niştey eniyan de vecênê.
Xeynê eniyan, tenî di kovarê bi kirmanckî emsar bîbî.
Vate
Kovara Vate bi kirmanckî (zazakî) hîrê aşman ra reyke vecêna. Kovara ke hetê Grûba Vateyî ra yena hedrekerdiş û yena vetiş emsar zimistan, bihar û amnan hîrê hûmarî vetî. Hûmara aye ya peyîne zey hûmara 73. vecîyaye.
Şewçila
Kovara Şewçila zî bi kirmanckî (zazakî) ya. Kovare di hûmara xwu ay 16. de weşaney xwu dabî vindartiş, ene payîzê 2022î de reyna dest bi weşane kerd. Kovare bi hûmara xwu ya 17. silam da wendoxan.
Erê, tenî di kovarê bi kirmanckî. Di mîyanê bi mîlyonan kirmancan de tenî di kovarî, ê zî bi hezar zehmetîyan vecênê û kenê ke serê lingan de bimanê. Û hetê vilakerdiş û rotişî de zî di mîyanê zehmetî de yê û helbet tay çap benê, tay benê vila, tay yenê rotiş û tay yenê wendiş.
Bi endêke kedêka qickeke go kirmanckî çawey beşko serê lingan de vindero? Go kirmanckî çawey beşko xwu ver bido? Persî zehf ê. Ma çi serey şima bidecnê.
Not: Hewteynan ma serê kitabanê kirmanckî yê 2022î de vinderê.
