Parlementerê HDPyî Omer Faruk Gergerlîogluyî tehlîye ra dima vat: ”Mi xo ver da la mi reyde şarî zî xo ver da. No serkewtişê şarî yo.”
Parlementerê Partîya Demokratîke ya Şaran (HDP) yê Kocaelî Omer Faruk Gergerlîoglu vizêr Zîndanê Sîncanî ra ame veradayene û dima bînaya Merkezê Pêroyî ya HDPyî de hetê parlementeran û endamanê partîye ra ame pêşwazîkerdene. Gergerlîogluyî kombîyayîşê çapemenîye de qisey kerd. Bînaya HDPyî hetê polîsan ra gêrîyaye binê ablûqa.
Gergerlîogluyî pê vateyê ‘Ma ça de mendbîyî’ dest pêkerd û ard ziwan ke ê heqdar ê coka bihêz ê û ey tim vat ke ‘na hîkaye tîya de nêqedîyena.’ Gergerlîogluyî vat: ”Ma apey gamêke nêeşte û nika ma tîya de yê. Mi xo ver da la şarî zî mi reyde xo ver da. No serkewtişê şarî yo. Ez sey wekîlê şarî kewta meclîs. Parlementerîya mi ameye betalkerdene la biewnê nika ma tîya de yê. Her cayê dinya ra mi rê paştdayîş ame.
Zîndan de pê qirkerdişê embaze Denîz Poyraze ma zaf dejayî. Zere de embazan tim mi rê nuşt, ez teyna nêverdaya. Ma qetî nêtersayî çunke ez zanena ke ma heqdar ê. Ez keyeyî ra lingwarve ameya destbendkerdene û wesayît de polîsan pê mi heqaret kerd. Beratê ma nê mesajî dano ke embazê ma zî do bêrê veradayene. No mesaj do dewaya vera partîya ma zî bênetîce bikero.”
Gergerlîogluyî qiseykerdişê xo pê vateyê ‘Xoverdayîş cuye ya’ qedîna. Çime: Anf
