Şaro kurd kêmî-zêde 50 serrî yo vera kolonyalîstan têkoşînê bêhempayî domneno. Nê têkoşînî de nameyê Mahsum Korkmazî wayîrê cayêkê avzelî yo. Korkmaz serra 1956î de qezaya Farqînî ya Amedî de maya xo ra bî. Serranê ciwanîye de keyeyê ci koç kerd ver bi Êlih. Korkmazî tîya de giran giran Têgêrayîşê Azadîye şinasna. Bi taybetî mabênkarîya Mazlum Doganî reyde rêxistin bî û şorişgerê bînî nas kerdî.
Mahsum Korkmaz yan nameyê xo yo bîn Egîdî Êlih de dest pê aktîvîteyanê şorişî kerd. O nê prosesî wina şîrove keno: “Ez cayo ke tede hîsê welatperestî hêzdar ê, yanî Farqîn ra yena. Têgêrayîşê Tirkîya yê şorişgerî zî mi ser o tesîrêko pîl viraşt. Ez wayîrê hîsanê merdimperestan a. Yew zî kesanê ciwanan û roşnvîran reyde têkilîyê mi est bîyî. Heme nê faktoran şorişgerbîyayîşê mi de rolêko girîng kay kerd. Tewrbîyayîşê min ê cuya şorişgere bi têgêrayîşê ma dest pêkerd. Verê cû vera şorişgerîye eleqeyê mi est bî, la tu têgêrayîşêkê sîyasî reyde têkilîya mi çin bîye. Têkilîya mi bi têgêrayîşê ma serra 1977î de dest pêkerd. Mîyanê ciwananê ke dormeyê komele de kom bîbî de tayê letebîyayîşî û grûbî est bîyî. Nê abirîyayîşan de mi de vera awanîya têgêrayîşê ma ya şorişgere meyl peyda bî. Wayîrbîyayîşê fikrê hemparî yê zafêrîya embazanê mi, hemverê grûbanê reformîst û sosyal-şovenîstan ez qanalîze kerdo kişta têgêrayîşê ma. Dima ra mi eleqeyê xo zêdîna û hişmendane hîra kerd.”
Mahsum Korkmaz û Kemal Pîr
Nê mîyanî de 27ê teşrîna peyêna 1978î de qezaya Licê ya Amedî de dewa Fîsî de yew partîye ronîyaye. Nameyê ci kurmancî de Partiya Karkerên Kurdistan yanî Partîya Karkeranê Kurdistanî bî. Armancê partî bêguman azadkerdişê pêro karkeranê Kurdistanî bî. Bado vera endamanê partî hêrişê çekdarî qewimîyayî û na çarçewa de mîyanê partî de seba xopawitişî meylê çekdarbîyayîşî peyda bî. Baxusus badê ke serranê 1978-1980an de qezayanê Curnê Reş û Sêwrege de xoverdayîş qewimîya, têkoşîno çekdar êdî hewce bî. PKKyî seba ke têkoşîno çekdar ravurîyo şerê gerîla yê profesyonelî û artêşa neteweyî, hamnan 1979 de tayê kadroyê xo şirawitî herêma Fîlîstîn û Lubnanî. Înan uca de perwerdeyê gerîla girewt û agêrayî Bakûrê Kurdistanî. No dem Mahsum Korkmaz zî mîyanê kadroyan de bî û 7 mengî perwerde girewt. Serekê nê kadroyan o dem Kemal Pîr bî. Serra 1980î de mabênê yewîyanê tirkan û gerîla de pêkewtiş qewimîya. Nê pêkewtişî de Mahsum Korkmaz bi hawayêkê dirbetinî xelisîya, la Kemal Pîr tepişîya. Hem tepiştişê Kemal Pîrî hem zî Derbeya 12yê Êlule destpêkê têkoşînê çekdarî texelna.
Şehadetê Karasungurî
Hamnan 1982 de PKKyî kongreya xo ya dideyine kerde. Kongre ra tepîya grûbê ke dest pê têkoşînê çekdarî kenê, şîyî kampanê ke sînoranê Başûr û Rojhelatê Kurdistanî de yê. Serra 1983yî de îdareyê PKKyî Lolan de babeta rêxistinkerdişê xoverdayîşê komelî nîqaş kerde. Goreyê planî têkoşîno çekdar do Zagros, Botan û Serhat de bêro kerdene. Êdî seba têkoşînê gerîlayan tay mendbî ke Mehmet Karasungur û Îbrahîm Bîlgîn kampa Partîya Komunîste ya Iraqî de kişîyayî. Bêguman şehadetê Karasunguro ke endamê Komîteya Merkezî ya PKKyî bî têkoşîno çekdar reyna taloq kerd.
Ronîyayîşê HRKyî
6 endamê Komîteya Merkezî ya PKKyî herêma Xinêre de 16-18 hezîrana 1984î de ameyî têhet. Nê kombîyayîşî de qerarê ronîyayîşê HRKyî (Hêzên Rizgariya Kurdistan) dîya. Dima ra seba çalakîyanê çekdaran ca û tarîx ameyî dîyarkerdene. Nê konteksî de 15ê tebaxa 1984î de Dih, Şemzînan û Şax de ganîyo ke qerekolî biameyêne sereştene. Mahsum Korkmazî çalakîya Dihî girewte xo ser. Ganî merdim xo vîr ra nêkero ke çalakîya 15ê tebaxe ra ver Egîd bîbî endamê Komîteya Merkezî ya PKKyî.
Çalakîya 15ê Tebaxe
Egîdî semedê çalakîye 13yê tebaxe de maketê Dihî sero wekinitiş kerd. 29 merdimî beşdarê çalakîye bîyî. Her merdimî rê yew wezîfe dîyabî. Roja 15ê tebaxe çalakîkerî şan de saete 19.30î de vejîyayî rayîr. Grûbe saete 21.00î de dekewte Dih û bi lezî abirîyaye 3 baskan. Çend deqayan dima vengê guleyê verênî ame. Pêkewtişî zî dest pêkerd. Nê mîyanî de hoparlorê camî de derheqê HRKyî de vilaweke ameye wendene. Mîyanê gerîla û leşkeran de pêkewtişan heta şewe dewam kerd. Pêşewe grûba gerîlayan Dih ra vejîyaye û 3 rojî dima resaye cayê xo yê bargehî. Na çalakîye tarîxê PKKyî de sey çalakîya çekdare ya yewine hesibîyena.
Şehadetê Egîdî
Çalakîya 15ê Tebaxe ra dima Egîdî têkoşînê xo bi qerardarî domna. Labelê 28ê adara 1986î de Şirnex de herêma koyê Gabarî de netîceya komployêkî de şehîd bî. Ey ra dima mîrasê mêrxasîye û xirtîye mend.
