Piştî hilbijartina rêveberiyên herêmî ya 31ê adara 2024an vir ve, 8 jê yên Partiya Wekhevî û Demokrasiyê ya Gelan (DEM Partî) û 2 jî yên Partiya Gel a Komarê (CHP) bi giştî li 10 şaredariyan qeyûm hat tayînkirin.

Wezareta Karên Hundir a Tirkiyeyê di destpêkê de hewl da ku qeyûm li Wanê bi cih bike. Lê piştî têkoşîna gel desthilatdariya AKPê neçar ma ku ji biryara xwe vegere.

Di 3yê hezîranê de li Şaredariya Colemêrgê qeyûm hat tayînkirin. Hevşaredarê Colemêrgê Siddik Akiş hat girtin.

Şaredarê Esenyurt a Stenbolê Ahmet Ozer ê CHPî ku bi modêla Lihevkirina Bajar hatibû hilbijartin jî di 30ê cotmeha 2024an de bi îdiaya ‘endamtiya rêxistinê’ hat binçavkirin û girtin. Li şûna Ozer, Cîgirê Waliyê Stenbolê Can Aksoy hat tayînkirin.

Di 4ê mijdarê de li Şaredariya Bajarê Mezin a Mêrdînê û şaredariyên Êlih û Xelfetî ya Rihayê yên DEM Partiyî qeyûm hat tayînkirin.

Di 22yê mijdarê de li Şaredariya Dêrsimê ya DEM Partiyê û Şaredariya Pulurê ya Dêrsimê ya CHPî qeyûm hat tayînkirin. Di 20ê mijdarê de li hevşaredarê Dêrsimê Cevdet Konak û şaredarê Pulurê Mûstafa Sarigul 6 sal û 3 meh cezayê hefsê hat birîn. Ev ceza weke hinceta qeyûm hat nîşandan.

Di 29ê mijdarê de hevşaredarê Miksê yê Wanê Ayvaz Hazir ji peywirê hat girtin û li şûna wî qeyûm hat tayînkirin.

Hevşaredarên Akdenîz a Mêrsînê Hoşyar Sariyildiz û Nûriya Arslan di 10ê çileyê de hatin binçavkirin û hatin girtin. Li şûna wan qeyûm hat tayînkirin.

Danişîna doza Hevşaredara Sêrtê Sofya Alagaş ku ji ber xebatên di dema rojnamegeriyê de bi îdiaya ‘endamtiya rêxistinê’ dihat darizandin, duh li 5emîn Dadgeha Cezayên Giran a Amedê hat lidarxistin. Dadgehê, 6 sal û 3 meh cezayê hefsê da Sofya Alagaş. Wezareta Karên Hundir a Tirkiyeyê piştî cezayê Sofya Alagaşê, li Şaredariya Sêrtê qeyûm tayîn kir.