dengê heyva li ser golê me îşev
gava xwîn diçe ji bejna spîndarê
olan e, dipişkive li Payîza demê
gava bêjî were li qeracê dayne
gava dêwên hesinî biçêrin li peravê
rengê heyva li ser golan im îşev
va ye gul tînim ji kaniyên devxwar
av şil dibe ji hilma guldexwînê
guppe gupa dilê olanê ye êdî
bila biçirûse heyhedana gulavê
çengê heyva li ser golê me îşev
dirazêm di eyarê guran de
dem dipişkive ji nîveka demsalê
dilûse salûla şevê, bêje hawar
bêje werin kulavên xewnan
em ê govendekê lêxin
bila binale asmên li kendalê sûlavê
Helbestek ji dosyeya bi navê “Hilbe Kobanî”ya Selîm Temoyî.